Aditz bakarrak adieraziko lukeen ekintza edo egoera aditzera emateko erabiltzen dugun aditz bat baino gehiagoko esapideari deritzo aditz-perifrasi multzoa. Aditz jakin batzuekin gertatzen da batik bat: aurkeztu, ekin, gertatu... (eta burutu, garatu, gauzatu eta gisakoekin).
Euskaltzaindiaren hitzetan, ez dirudi bide egokia, baldin bigarren aditzak oinarrizkoari esanahi argirik edo gehiagorik ematen ez badio; halakoetan, mesedea izan beharrean, traba da komunikaziorako. Estilo liburu anitzek erraten dute bertzelako aukera batzuetara jotzea komeni dela.
- Udalak langileak fitxatzeko erlojuen aldaketari ekin dio egunotan > Udalak langileak fitxatzeko erlojuak aldatu ditu egunotan.
- Zubiaren eraikuntza egitea da helburua > Zubia eraikitzea da helburua.
- Proposatzen diren ariketak nahitaezkoak gertatzen dira gida didaktikoko helburuak lortzeko.
- Zailtasunak aurkezten dituen ikaslearentzat...
- Txirrindulariak prest zeuden irteera hartzeko / irteerari ekiteko > irteteko.
- Gaur emanen zaio hasiera kanpainari > hasiko.