Aste honetan, Atlantikoko Europa Hegoaldeko Erregioen Konferentzian parte hartu zuten Nafarroako Gobernuak eta Pirinio Atlantikoetako Prefeturak, eta, bertan, Sergio Perez Garciak, Nafarroako Kanpo Ekintzetarako zuzendari nagusiak, mugen itxiera malgutzeko eskaera egin zion Eric Spitz prefetari. Perezen hitzetan, mugako zortzi pasabide horiek itxi izanak «eragozpen ugari» eragin dizkie muga inguruko biztanleei: «Lan edo familia arrazoiengatik lurralde batetik bestera ibili behar dutenen mugimendua oztopatzen du, eta martxan diren lankidetza proiektuen garapena zaildu». Hortaz, «salbuespenak» paratzeko eskatu zion Nafarroako Gobernuko ordezkariak prefetari.
Eskaera honen aitzinean, Pirinio Atlantikoetako prefetak erantzun zuen muga ixteko erabakia «ezohiko baldintzatan» hartu zela, eta debekua «luze gabe» kentzeko asmoa dutela. Hala ere, «inguruko herritarrek pairatzen dituzten eragozpenak arintze aldera» hainbat neurri adosteko prest azaldu zen.
