Madrilgo Zelena Renovable enpresak Arantzako, Igantziko, Sunbillako eta Etxalarko lurretan egin nahi duen Azkua izeneko parke eolikoaren berri izan dutenetik, mugitzen hasiak dira Arantzan. Gaiarekin kezkatuta, bi batzar egin dituzte, eta horrekin batera, Arantza Bizirik taldea sortu dute. Bihar, berriz, ortziralea, parke eolikoei buruzko solasaldia antolatu dute. Lesakako Endara Bizirik plataformako kideak eta Sustrai Erakuntza Fundazioko kideak gonbidatu dituzte eta haiek izanen dira hizlariak. «Lehenbizikoak Lesakan egin nahi izan zuten parke eolikoaren kontra egin zuten ibilbidearen berri ematera etorriko dira, eta bigarrenak, bertzeak bertze, energia berriztagarrien hedapenaz solastatzera».
«Arantza bizirik nahi dugula eta gure mendiak bizirik nahi ditugula» aldarrikatu dute Arantza Bizirikekoek, eta herritarrei hitzaldi horretara joateko deia egin diete. Horrekin batera, Azkua proiektuak hartuko lituzkeen herrietara ere luzatu dute mezua eta igantziarrei, etxalartarrei, sunbildarrei eta gaian interesa duten guztiei joateko gonbita egin diete.
