Bera herrian edukiontziak eta ibilgailuak erreak agertu ziren joan den urtean, eta mendian hainbat sute izan ziren. Horiek gogoan izan ditu Berako Mendi Batzordeak prentsa-oharrean eta 2020a «bide beretik» hasi izana kritikatu du. Atzo izan zen Larhun magalean azkena. Mendiko sute horiek «nahita sortuak» direla eta «egoera hagitz larriak» izan direla salatu du batzordeak. «Suhiltzaileen lanari esker ez da kalte handiegirik izan, baina horrela segituz gero eta eguraldiaren baldintzek laguntzen badute, izugarrizko triskantza eragiten ahal dela ohartarazi nahi dugu».
Mendiari baimenik gabe su ematea «delitu larria» dela oroitarazi nahi izan du: «sei urte arteko kartzela-zigorrarekin gaztigatzen ahal da, 20 urte arte gizakientzat arriskua izan bada, gehi isunak».
Azken urteotako neguak «nahiko idorrak» izan direla ikusita, «mendian sute handiak izateko baldintzak» badirela dio oharrak. «Hala ere, sua ez da berez sortzen normalean eta Berako kasuan behintzat garbi dago azkeneko suteak nahita sortuak izan direla».
Horregatik guztiagatik herritarrak «erne» ibiltzeko deia egin du batzordeak: «mendian mugimenu arrarorik ikusten badute honen berri eman dezatela udaletxean edo 112ra deituta. Ea denon artean gure mendiak erre gabe mantentzea lortzen dugun».