Lesakako Udalaren eta herriko ekoizleen, artisauen eta komertzioen arteko elkarlanari esker merkatu ttikia eginen dute abuztuko azken larunbatean ere, abuztuaren 30ean, Lesakako Beheko Plazan. 10:00etatik 14:30era hainbat lan eta produktu ikusteko eta erosteko aukera izanen da, «toki ttikietan gauza handiak gertatzen direlako».
Martxel Rodriguez lesakarrak eta Jon Lopezek zuzentzen duten Led Silhouette dantza konpainia bere azken sorkuntza prestatzen ari da. Ultimatum lana sortzeko Nafarroako Gobernuko Kultura Zuzendaritza Nagusiak sustatutako DNA-Nafarroako Dantza Garaikidearen aurtengo programaren erresidentzia artistikoa egin dute abuztu osoan. Lan hori ezagutzera emateko entsegu irekia eginen dute abuztuaren 30ean, larunbatean 19:00etan hasita, Harriondoa kultur etxeko komentuan.
Arantzako Aterpeko udako kontzertuen barrenean, Besarka taldea ariko da abuztuaren 30ean.