Lekeitioko Udalak antolatzen du Euskal Zine Bilera eta aurtengoa 46. edizioa izan da. Larunbateko ekitaldian hainbat sari banatu zituzten: film onenaren saria, zuzendaritza onenarena, gidoi onenaren saria, gazte 22 saria eta azkenik, ikusleek emandako botoen bidez EITB Ikusleen Saria. Hain zuzen hori izan zen Bertizek eskuratu zuena.
Sinopsia
Hitza eman nion lana 24 minutu eta 23 segundoko lana da eta honela dio sinopsiak: Teresa eta Martin 10 urteko bi anai-arreba, umezurtz gelditu dira beraien aitak bere buruaz beste egin ondotik. Honen harira, elizak Pilartxo izeneko neska gazte eta goxoa bidaltzen du hauen etxera umeak zaintzeko helburuarekin.
'Eklipse morala' lana ere saritua
Berriki, berriz, Madrilgo III. Actrum International Film Festen saritu dute Eklipse morala Bertizen lana, film laburren atalean. Hamazazpigarren mendean giroturiko film laburra da, garai hartan inkisidoreek erre zituzten sorginak gogoan egindakoa. Duela bi urte, Leurtzako urtegi inguruan aritu zen grabatzen eta aktore lanetan familiakoak eta lagunak izan zituen Bertizek.
