Nafarroako 18. txapela jantzi du Antonio Alustiza aresoarrak

Ttipi-Ttapa/Xorroxin 2018ko abu. 30a, 07:42
Antonio Alustiza Jai eta Aske txakurrekin.

Uharte-Arakilgo Artzain Egunean. Artzain Txakur Txapelketaz gain, gazta lehiaketa egin zuten eta Lekarozko Kortariko gasnak irabazi zuen

Sei artzainek eta zortzi txakurrek parte hartu zuten joan den abuztuaren 26an Uharte Arakilen jokatu zen Artzain Txakur Txapelketan. Tartean zen Antonio Alustiza aresoarra, eta bertze urte batez, fin-fin moldatu zen. Jai txakurrarekin bere 18. txapela jantzi zuen Alustizak. Gazta lehiaketan, gazta irabazlea enkantera  atera zuten eta  4.550 euro ordaindu zituzten gazta erdiaregatik.

Uharte Arakilgo saioan, aresoarrak bertze txakur batekin ere parte hartu zuen, Askerekin, eta horrekin hirugarren postua eskuratu zuen. Eskualdeko ordezkari gehiagok ere parte hartu zuten Uharte Arakilgo saioan. Joxe Mari Istilart amaiurtarrak   laugarren eta zazpigarren postuak lortu zituen, Bizkor eta Ttipi txakurrekin.  Jorge Oteiza oronoztarra, berriz, bosgarren gelditu zen, Arakil txakurrarekin.

Gazta saritua
Artzain Egunaren barne, bertze hainbat lehiaketa egin zituzten. Tartean, gazta lehiaketa. Sari nagusia Lekarozko Kortariko gasnarentzat izan zen. Maddi Jimenez eta Julen Arburua ama-semeek hartu zuten saria: trofeoa, 800 euro, txapela eta kaikua. Gazta irabazlea enkantera ere atera zuten eta Hotel Muga de Belosokoek 4.550 eurotan hartu zuten. Urdazubiko bengotxeatarrak laugarren gelditu ziren gazta lehiaketan.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun