Aski da! Eraso matxistarik ez! lelopean elkarretaratzera deitu dute 20:30ean Lesakako Plaza Zaharrean Xulufrinak Lesakako Sare Feministak eta Marrako Bortzirietako Gazte Feministen Taldeak. Lesakako Udalak ere bat egin du deialdiarekin.
Xulufrinak eta Marrako taldeek «nazkatuta» daudela azpimarratu dute eta Lesakako Udalak «emakumeen kontrako edonolako indarkeriaren aurrean bere gaitzespen jarrera eta kondena» adierazi nahi izan ditu. Horrekin batera, «erasoa sufritu duten emakumeei babes eta elkartasunik zintzoena erakutsi eta, aldi berean, emakumeek indarkeriarik gabe bizitzeko duten eskubidea berma dadin lanean segitzeko konpromisoa» berretsi du.
Pasa den astean ere karrikara atera ziren Lesakan eraso matxisten kontra. Izan ere, gizonezko bat atxilotu zuten eraso matxistengatik. Jende aunitz bildu zen plazan Xulufrinak eta Marrako taldeek eta udalak antolatutako elkarretaratzean.
