Bi eskaera nagusi ditu plataformak. Alde batetik Gotzone Sagardui Eusko Jaurlaritzako Osasun sailburuari egungo proiektua geldiarazteko eskatu diote. Bertzetik, Osakidetzaren, kaltetutako udalen —tartean Bortzirietako bortz herriak—, sindikatuen eta Ospitaleko bloke sanitarioaren artean mahai bat eratzeko eskatu diote Sagarduiri, bertan aztertu daitezen ospitalearen etorkizuneko behar tekniko eta sanitarioei buruzko proposamenak. Gainera, obrak egiten diren bitartean, beharrezkoak ez diren lekualdaketak ez egiteko eskatu dute.
«Ez da batere onargarria beste beste batzuetatik jakitea hematologia-zerbitzua desagertuko dela», salatu du plataformak. Eta ea «bigarren mailako herritarrak» ote diren galdetu diete agintariei. «Ardura» eskatu diote Sagarduiri eta herritarrei manifestazioan parte hartzeko deia luzatu diete.
Osasun Bidasoa plataformaren eskariekin bat egin dute Bortzirietako bortz herrietako alkateek, eta ospitaleko lanen esleipena geldiarazteko eskatu zuten urtarrila bukaeran. EH Bilduk bere aldetik Bidasoa ospitaleko bloke kirurgikoaren eraberritze obra ez hastea eskatu zuen urtarrilean ospitaleko atean egindako agerraldian.
