Nafarroako Aldizkari Ofizialean gaur argitaratu dute Hezkuntza Departamentuaren ebazpena, eta hor ageri denez, 2023-2024 ikasturtean, «modu esperimentalean», jardunaldi jarraitua izanen dute Amaiurko eta Arizkungo eskoletan. Nafarroako bertze ikastetxe batzuetan ere onartu du eskaera. Ez, ordea, Baztan Ikastolan; eta jardunaldi zatituan segitu beharko dute heldu den ikasturtean. Gobernuak «familien botazioan eskatutako portzentajea lortu ez zutela» erranez arrazoitu du erabakia. Baztan Ikastolan gurasoen gehiengoa jardunaldi jarraituaren alde agertu zen, % 58 inguru alde, baina ez zuten behar zen % 60 lortu.
Amaiurko kasuan, jardunaldi jarraitua izateko boto bakarrera gelditu ziren. Nora Salbotx Amaiurko eskolako zuzendariak TTIPI-TTAPAri kontatu zionez, «gurasoen bozketan % 58 jarraituaren alde agertu zen, baina ez genuen legeak eskatzen zuen % 60 lortu. Gure eskolan boto batek % 4ko balio du eta beraz, boto bat gehiago atera izan balitz, jarraitua izanen genukeen». Alde horretatik, «prozedura ez dela bidezkoa» zioen Salbotxek.
Baztango herri ttikietako eskolek urteak daramatzate elkarlanean. Aurten, ordea, Amaiurko eta Arizkungo eskoletan izan ezik, gehienak jardunaldi jarraituarekin gelditu dira, eta antolatzerakoan «sekulako konplikazioak» izan zituztela gehitu zuen Salbotxek: «espezialistak, proiektuak, ateraldiak, formakuntzak, koordinazioa... Dena konpartitzen dugulako».
Gisa honetara, eskualdean, Haur eta Lehen Hezkuntzetako 23 ikastetxetan jardunaldi jarraitua izanen dute 2023-2024 ikasturtean eta gainerako zortzietan zatitua.
Zein jardunaldi dute eskualdeko ikastetxeek heldu den ikasturtean?
Baztan
| Almandoz IP | Jarraitua |
| Arraioz IP | Jarraitua |
| Azpilkueta IP | Jarraitua |
| Elizondo IP | Jarraitua |
| Erratzu IP | Jarraitua |
| Gartzain IP | Jarraitua |
| Irurita IP | Jarraitua |
| Lekaroz IP | Jarraitua |
| Oronoz IP | Jarraitua |
| Ziga IP | Jarraitua |
| Amaiur IP | Jarraitua |
| Arizkun IP | Jarraitua |
| Baztan Ikastola | Zatitua |
Malerreka
| Doneztebe IP | Jarraitua |
| Ituren IP | Jarraitua |
| Saldias IP | Jarraitua |
| Sunbilla IP | Jarraitua |
Bortziriak
| Etxalar IP | Jarraitua |
| Lesakako ikastola | Jarraitua |
| Arantza IP | Zatitua |
| Bera IP | Zatitua |
| Bera IP | Zatitua |
| Berako ikastola | Zatitua |
| Berako Jesusen Bihotza | Zatitua |
| Igantzi IP | Zatitua |
| Lesaka IP | Zatitua |
Leitzaldea-Urumealdea
| Areso IP | Jarraitua |
| Goizueta IP | Jarraitua |
| Leitza IP | Jarraitua |
Foru aginduarekin lanean
Bertzetik, Hezkuntza Departamentuak ikastetxeen jardunaldia arautzen duen sistema egokitzeko foru agindu berria onartzeko prozedura administratiboari hasiera eman dio. Gobernuak joan den azaroan iragarri zuen jardunaldi jarraituaren eta malguaren «izaera esperimentala» bukatu ondotik, ikastetxe guztiek 2024-2025 ikasturterako beren lanaldia erabaki beharko zutela foru agindu berriaren arabera. Jakinarazi duenez, horretarako prozesu parte hartzailea egin dute guraso elkarteekin, ikastetxeetako zuzendariekin eta sindikatuekin.
