Asteburuan hasi da Bertsolari Txapelketa Nagusia Getxon eta Arrasaten jokatutako saioekin. Arrasateko saioan zen kantatzekoa Xabier Silveira bertsolari lesakarra. Azken orduko arrazoi pertsonalak tarteko, Silveira ezin izan zen Arrasateko saiora joan eta, beraz, arautegiak hala zehaztuta txapelketatik kanpo gelditu da. Xabat Illarregi bertsolari leitzarrak ordezkatu zuen atzo Silveira, bera baitzen Nafarroako sailkapenean hurrengo sailkatua.
Txapelketa Nagusiko arautegiak zehazten du bertsolari batek saiora joan ezin badu 48 ordu baino gehiagoko tartearekin abisatu behar duela, eta kasu horretan talde antolatzaileak erabakitzen du bertze saio bateko zein bertsolarirekin aldatu. Silveiraren kasuan, ordea, azken orduko arazo pertsonalengatik ez zen bertaratu, eta beraz, txapelketatik kanpo gelditu da.