Horrela, Joanes Illarregik Elizondoko finalaurrekoan kantatuko du urriaren 22an, Unai Agirrerekin eta Alaia Martinekin batera. Beste bost bertsolariek puntuazioaren arabera izango dute finalaurrekoetara sailkatzeko aukera.
Lehen fasea epaitzeko lana duten seikotea aritu da atzokoan ere puntuazioa jartzen: Egoitz Iradier Martinez de Albeniz, Eneko Bidegain Aire, Jurgi Fuentes Goikoetxea, Karlos Ibarguren Olalde, Leire Beloki Lizarralde, Miriam Juaristi Urizar eta Saioa Mitxelena Irazoki beratarra. Idazkari lanetan, berriz, Ane Errazkin Aranburu eta Joxe Mari Altuna Berridi.
Arrasaten ere, zortziko nagusi eta txikiko saioak egin zituzten bertsolariek lehenengo, eta puntu erantzunak eta hamarreko txikiko ariketa gero. Azkenik, ganbarako lanean jardun zuten. Hauxe izan zuten gaia: «Autoa hartu duzu bila joateko. Iristear zinela, ordea, buelta ematea erabaki duzu».
Bertsolarien agurrekin amaitu zen saioa.
Bezperan, Alaia Martin nagusi
600 lagun bildu ziren larunbatean Getxoko Muxikebarri zentroan Bertsolari Txapelketa Nagusiko lehenengo saioan. Imanol Artola Arretxe 'Felix' gai-emaileak gidatu zuen saioa.
Ariketa puntuagarriak egin ondotik, Alaia Martin oiartzuarra izan zen puntu gehien bildu zituen bertsolaria, 738 puntu. Beraz, zuzenean sailkatu zen finalaurrekoetara eta Elizondon kantatuko du urriaren 22an. Haren ondotik geratu ziren Nerea Elustondo 695rekin, Agin Laburu 685rekin, Oihana Bartra 653,5ekin, Unai Mendizabal 635ekin eta Peru Abarrategi 627rekin. Horiek ere lehen faseko saio guztiak bukatu arte itxaron beharko dute finalaurrekoetara sailkatu diren edo ez jakiteko.
Finalerako sarrerak agortuak
Igandean saldu dira azken sarrerak. Harmailakoak eta pistakoak bukatuta zeuden, eta bukatu dira errebotekoak ere. Bete da aforoa, beraz, eta ez da sarrera gehiagorik salgai jarriko.
Momentuz, bertze saio guztietarako sarrerak daude salgai www.bertsosarrerak.eus atarian.
Ekainean, Bertsolari Txapelketa Nagusia aurkeztearekin batera, salgai jarri ziren finaleko sarrerak. Bertsozale Elkarteko bazkideek sarrera erreserbatuta izan zuten sarrera lehenengo astean. Uztailetik aurrera, bazkide zein ez bazkideek izan dute aukera txartelak eskuratzeko.
