155 erabiltzaile dituzte bertan bizi direnak, baina eguneko zentroan bertze 60 plaza dituzte, egunez bakarrik joaten direnentzat. Egonaldi laburrak egiten dituztenak ere badituzte, «etxean bizi dira baina momenturen batean asteburu bat edo egonaldi motz bat egin behar izaten dutenak, etxera itzultzeko asmoarekin». Bertan terapiak, tailerrak eta hainbat jarduera egiten dituzte adinekoak estimulatzeko.
Etxez etxeko laguntzako zerbitzu berria ere eskaintzen dute, «etxean bertan laguntzeko edo zentrora eramateko. Behar guztiez, txikienetik handietaraino, arduratzen gara». Gainera, hau ez da adineko pertsonentzako bakarrik, arreta bereziak behar dituzten guztientzako baizik.
Mugaz gaindiko egoitza da Anaka, «hitzarmen bat baitugu Iparraldeko Départementarekin 2015etik eta Iparraldeko jendea gure zentroetara etor daiteke bai eguneko zentrora baita egonaldi laburretarako ere, Frantziar Estatuko dirulaguntzarekin». Euskal Herri osoko jendearentzat ditu zabalik ateak egoitza honek.