N-121-A

Nazioarteko garraio astuna desbideratzeko eskatuz, bigarrenez, N-121-A eta PA-30 errepideak moztuko dituzte maiatzaren 14an

Ttipi-Ttapa 2021ko mai. 8a, 08:00
Alkaiagan errepidea moztuko dute.

Apirilaren 16an egindako errepide mozketen bidetik, heldu den ortziralean ere, maiatzaren 14an, N-121-A eta  PA-30 errepideak moztuko dituzte. Aldi honetan, ordea, bi puntutan moztuko dute: Alkaiagako bidegurutzean, N-121-A errepideko 63-64. kilometroan eta Uharteko Zokoarena biribilgunean, PA-30 errepideko 8-9. kilometroan. Bi kasuetan 20:00etan egina dute hitzordua eta helburua orain arteko bera izanen da: errepide seguruago bat eskatuz nazioarteko garraio astuna A15era desbidera dezaten eskatzea.

Horrek errepidearen segurtasuna hobetuko duela sinetsita, lanean segitzen dute herritarrek eta, berriki, plataforma bat sortzeko asmoa adierazi dute. Eskaerarekin bat egiten duten herritarrak plataforma batean bildu nahi dituzte, eta argi utzi nahi izan dute, «bakoitzaren alderdiarekin eta karguekin loturarik izan gabe, herritarrek sortutako plataforma» izanen dela. Halaxe adierazi dio Mikel Uriarte Oronoz-Mugairiko suhiltzaileak TTIPI-TTAPAri: «orain arte alkateak eta suhiltzaileak bultzatu dugu eskaera hau, baina hemendik aitzinera helburu argi horrekin ados dagoen edozein herritar bildu nahi dugu plataforman». Talde hori «anitza eta gardena» izanen dela nabarmendu du.

DGTren 2017ko txosten batek desbideratzea proposatu zion Espainiako Barne Ministerioari

DGT Espainiako Trafiko Zuzendaritzaren 2017ko txosten bat ere ekarri du gogora Uriartek eta adierazi duenez, «txosten horretan DGTk nazioarteko garraio astuna N-121A errepidetik A15era desbideratzea proposatu zion Espainiako Barne Ministeriori».

Nafarroako Gobernuaren aldetik, ordea, Uriartek ez du «interesik» ikusten. Baina bidea hori dela konbentzituta, borrokari eusteko konpromisoa dutela dio, eta Kataluniako adibidea paratu du mahai-gainean: «Katalunian, 79 egunez segidan errepidea moztu zuen herri bakar baten iraunkortasunak Frantziako mugara doan N-II errepidean kilometro osoko trafiko astuna desbideratzea lortu zuen».

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun