Koronabirusa

Gaur-gaurkoz, adinekoen eta ezgaituen Nafarroako egoitza guztiak koronabirus kasurik gabe daude

Ttipi-Ttapa 2020ko eka. 29a, 15:07
Elizondoko zahar etxean 19 adineko hil ziren koronabirusarekin, horietatik 16 proba egin eta baieztatuak, eta 3 baieztatu gabe.

Bertze agerraldiren bat gertatuz gero, Nafarroako Gobernuaren Gizarte Eskubideen Departamentuak prest du plan bat aurreikusiz nola jokatu beharko litzatekeen.

 

Hala ere, Mª Carmen Maeztuk, Gizarte Eskubideen kontseilariak adierazi duenez, «horrek ez du erran nahi erne egon behar ez dugunik. Egindako lan guztiaren ondotik, eta pandemiak eragin duen sufrimendu guztia ahaztu gabe, ahaleginak areagotu behar ditugu berragertze bat prebenitzeko eta saihesteko». Horretarako, adinekoen egoitzetan babes neurri zorrotzak betetzen eta kontingentzia planak prestatzen ari direla gaineratu du, datozen hilabeteetan gerta daitekeenari aitzina hartzeko.

Kontingentzia-plana

Bertzalde, astearte honetan, Gizarte Eskubideen Departamentuak kontingentzia plana aurkeztuko die ANEA eta LARES entitateei, Nafarroako adinekoen egoitzak biltzen dituzten entitateei. Dokumentu horrek ezartzen du diagnostiko-testak egiteko eta positiboak atzemanez gero bitarteko baliabideetara bideratzeko prozedura zein izanen den. Adinekoen egoitzetan agerraldi berriak saihestea da kontua edo, agerraldirik gertatuko balitz, azkar jardutea kutsatze-katea ez zabaltzeko.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun