Koronabirusa

Mugaz gaindiko langileei ohiko pasabideak irekitzea eskatu diote Urdazubi, Zugarramurdi, Baztan, Etxalar eta Berako alkateek Pirinio Atlantikoetako prefetari

Betiko muga pasabideak mugaz gaindiko langileei irekitzeko eskatu dute alkateek.

Urdazubi, Zugarramurdi, Baztan, Etxalar eta Berako alkateek Pirinio Atlantikoetako prefetari idatzi bat bidali diote mugaz gaindiko langileei gure herrietako ohiko muga pasabideak irekitzeko eskatuz.

Izan ere, Covid-19aren pandemia dela eta, Frantziak Lapurdi eta Nafarroako arteko muga pasabide gehienak ixtea erabaki zuen; Dantxarinekoa ez. Horrek Baztan-Bidasoan sekulako traba eta eragozpenak eragin ditu, gehienbat mugaz gaindiko langileentzat. Urteetan izan dira hainbat ekitaldi eta egoera non mugak bereziki zainduak izan diren. Miarritzen izandako G7-an kasurako, muga estuki zaintzea erabaki zen, baina muga pasabideak, kontrolak eginez, zabalik atxiki zituzten.

Covid-19-a dela eta, derrigorrezko joan etorriak bakarrik baimentzen dira. Mugaz gaindi egunero lanera joan behar dutenak ez dute bertze erremediorik, autoa hartu eta muga zeharkatu behar lan tokira iristeko.  

Egoera honetan Saratik, Senperetik, Urdazubitik edo Zugarramurditik, Berara, Etxalarrera edo Lesakara edo alderantziz lanera joateko konparaziora, hainbat ordezko bide hartu behar dira, eta autoz bidaia luzeak egitera behartuak daude langileak, arriskua eta kostu ekonomikoa areagotuz. 

Horregatik, Bera, Etxalar, Baztan, Urdazubi eta Zugarramurdiko alkateek zera eskatu diote M. Eric Spitz prefetari: «gure ohiko eta betiko muga pasabideak mugaz gaindiko langileei irekitzeko».

Erlazionatuak

GUTUNA. Salatu nahi dut Frantzia eta Espainia arteko muga hainbat tokitan ixtea

Xareta Senpere

Izan dira urteetan mugaren bi aldeetara atentatuak, droga trafikoa, kontrabandoa, hilketak, denetariko delinkuentzia, Miarritzen izandako G7a eta, ...

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun