Nafarroako parlamentuko presidentea N121A errepideko alkateekin eta Olagueko istripuan hildakoen senideekin elkartu da

Unai Uhalde, Nafarroako Parlamentuko lehendakaria, Mikel Manzano eta Xabier Tabernaren senideekin eta N121A errepidearen inguruko udal ordezkariekin bildu da gaur.

Epe luzeko neurriak ez ezik, istripuak murrizteko berehala hartu beharreko neurriei buruz ere ariko dira ortzegunean Parlamentuan

Unai Hualde Nafarroako Parlamentuko lehendakariak Mikel Manzano eta Xabier Tabernaren senideak eta inguruko udaletako alkate eta ordezkariak hartu ditu gaur. Mikel Manzano eta Xabier Taberna hilaren 11n hil ziren N-121-A errepidean, Olague parean. Gaurko bileran, errepide horretan «ezbeharrak murrizteko premiazko neurriak» hartzeko beharra planteatu dute, autobia moduan edo 2+1 moduan egin daitezkeen epe luzeko konponbideetatik haratago. Ortzeguneko plenoan gai honetaz ariko dira Parlamentuan.

Ildo horretatik, Unai Hualdek parlamentuko talde parlamentarioekin harremanetan jartzeko aukera eman du, ahalik eta lasterren egokitzat jotzen diren ekimenak planteatzeko eta aztertzeko lan-saioa egin ahal izateko.

Juan Carlos Unanua, Igantziko alkateak eskerrak eman dizkio Parlamentuko lehendakariari, jarrera ona duelako, eta nabarmendu du beharrezkoa dela «odoluste hau lehenbailehen gelditzea. Dagoeneko berandutzerik onartzen ez duen gizarte-arazo baten aitzinean gaude».

Nafarroako Parlamentuan egindako bileran parte hartu dute, bertzeak bertze, Bera, Lesaka, Igantzi, Arantza, Etxalar, Ezkabarte eta Doneztebeko alkateek eta Baztan eta Anueko udal karguek.

Mikel Manzano eta Xabier Taberna, 21 eta 19 urteko Donostiako eta Igantziko bizilagunak, hurrenez hurren, Olagueko saihesbidean hilaren 11n gertatutako trafiko istripu batean hil ziren. Kamioi bat eta lau auto zeuden ezbeharrean, bertze bortz lagun zauritu ziren.

Erlazionatuak

Kamioientzat egunaren arabera txandakako joan-etorria berrezartzeko eskatuko dio Manzano-Altuna familiak Arartekoari

Mendialdea

Urtarrilaren 11n Olaguen gertatutako auto istripuan zendu zen Mikel Manzano Altuna donostiar gaztearen familia Francisco Jabier Eneriz Olaetxea Naf...
«N121A errepideak konponbidea behar du, lagundu faborez»

Mendialdea

Joan den larunbatean Olagueko auto istripuan hil zen Mikel Manzano Altuna donostiarraren gurasoek eta arrebak  halaxe adierazi dute gaur goize...
N121A errepideari buruz, astelehenean Nafarroako parlamentuan egindako bileraz, Juan Karlos Unanua Igantziko alkatearekin solasean

Mendialdea

Joan den ilbeltzaren 11ean, N121A errepidean, Olaguen izandako istripuan zendu ziren Mikel Manzano eta Xabier Tabernaren senitartekoekin eta eskual...

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun