Herriko gazteek jakinarazi dutenez, «ostirala lasaia izan zen eta larunbatean, besta eguna zenez, goizetik hurbildu ginen plazara. Eguna giro ederrean pasa genuen, baina gaua ailegatu zenean besta giroan hainbat ekintza onartezin gertatu ziren». Horregatik, ondoko gertaerak salatu dituzte:
- Herritar bati motorra ebatsi zioten.
- Beste herritar bati kotxea hartu eta herriko landan zehar ibili ziren, lursaila hondatuz eta kotxea izorratuz.
- Hainbat komun manipulatuak izan ziren: estalpekoa (putzuak sortuz) eta komun publikoa (karrika oso bat bustiz).
- Estalpean jendea sabaiko hodietatik zintzilikatu zen, hodiak erabat okertuz.
- Zenbait etxetako loreontziak lekuz mugituak izan ziren.
- Plazaren ondoan dagoen etxe bateko ataria margo arrosarekin zikindu zuten.
Adierazi dutenez, «ez da horrelako zerbait gertatzen den lehenengo aldia. Askotan jasan behar izan ditugu lekuz kanpo dauden gertaera eta jarrerak. Nazkatuta gaude». Euskararen Eguna «denok ongi pasatzeko antolatzen dugun eguna da eta denon artean egin behar da posible. Gainontzeko guztia ongi joan zen arren, tristea da zapore txar honekin gelditu behar izana».