Egun handia larunbatean
Urriaren 7a, larunbata izan zen egun handia eta borobila suertatu zen. Herriko eskulangileen lanak izan ziren ikusgai eta erosgai plazan. Urdaiazpiko eta gazta apustua ere egin zuten eta hauen pisura gehien hurbildu zirenek eraman zituzten etxera, Garazi Santestebanek urdaiazpikoa eta Marimar Bergarak gazta. Joaldunak ere ibili ziren herrian barna eta eguerdian aizkora apustu bikaina jokatu zuten herriko aizkolariek. Raul Castro eta Antonio Jaunarena beteranoak nagusitu zitzaizkien Mikel Indakoetxea eta Mikel Santesteban gazteei baina lau aizkolariek lan ederra egin zuten. Bittori Elizalde eta Iker Gorosterrazu balkoirik balkoira bertso kantari aritu ziren, megafoniaren arazoen gainetik. Ondotik, inoiz izan den herri bazkari jendetsuena izan zen, 140 heldu eta hainbat haur bildu baitziren bazkaltzera.Bazkal ondoan, haurrek eta helduek Marsel magoaren ikuskizunarekin gozatu zuten. Turrutxiki txaranga ibili zen arratsaldean eta gau partean Korrontzi taldeak herri guztia dantzan jarri zuen. Euskararen Eguna borobiltzeko, gauerdian hasita, Trikidantz taldearekin dantzaldia izan zen eta zubietarrak agurra egin zioten hainbat ekitalditan musika jarri duen taldeari.
Biharamun gazia
Gazteek udalaren laguntzarekin antolatutako Euskararen Eguna bikaina izan zen, baina biharamun gazia utzi zuen. Motor bat ebatsia, auto bat hartu eta landa batera sartua, itxidurak, artoa eta besteak hondatuz, etxe-atariak zikinduak… Zail da ulertzea festa bati horrelako bukaera eman behar izatea edo festa egiteko halako “ekintzak” egin behar izatea, baina batzuk halaxe egiten dute, besteek egindako lan dotorea zapuztuz.