Ttipi Txartela

«Web orri eta sare sozialak beste erakusleiho bat dira»

Ttipi-Ttapa 2021ko mai. 15a, 13:00

Duela 30 hasi zuen Pikabeak bere ibilbidea Donezteben. Bere amak ile-apaindegi bat zeukan bertan, eta estetika ikasi zuenez eta osagarri eta bitxiak asko gustatzen zitzaizkionez, ondoan ireki zuen apaindegi/lurrin-denda Amaiak. Duela 13 urte erreforma egin zuten, eta gaur egun dena bat da; Amaya Picabea Estetika zentroa.

Honen ondorioz, «hagitz eskaintza zabaleko denda dugu; ile-apaindegia, depilazio eta makillaje eskaintza, masajeak, manikura, pedikura, solariuma, azala zaintzeko tratamenduak…» Hau gutxi balitz, «arropa eta osagarri gehiago ere sartu ditugu orain», bezeroen irudia alderdi eta ikuspuntu guztietatik zaindu eta berritu ahal izateko.

Sare sozialak gaur egun edozein negoziorentzat garrantzi handikoak direla azaldu digu Amaiak; «bertze erakusleiho bat da, jendeak web orrian begiratzen du eta gero deitzen edo idazten digu, gauzak zenbat balio duten eta zein neurrikoak diren jakiteko». Gainera, produktuak gordetzeko ere eskatu ohi dute, «eta gero bila etortzen dira». Honek asko errazten du dendari eta bezeroaren arteko harremana.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun