Postuz postuko bueltaxka
Goizean goizetik jendea harat-honatean ibiliko da karriketan. Ez da horretarako aitzakiarik faltako. 200 salmahai baino gehiago paratuko dituzte saltzaileek; batzuk urrutitik etorriak, bertzeak eskualdekoak, denendako tokia izanen da. Eskaintza zabala jarriko dute eskura: gozoak, jakiak, artisau-lanak, lanabesak, jantziak… Saharaztan elkartekoek ere urteroko txokoa jarriko dute eliz atarian. Taloa eta gaztain erreak dastatzeko aukera ere izanen da baita ikas-bidairako dirua lortzeko ikasleek prestatuko dituzten pintxoak jatekoa ere. Bueltaxka eman ondotik, indarrak berritu nahi dituztenek ostatu eta jatetxeetan izanen dute aukera. Ferietako menu bereziak prestatzen hasiak dira dagoeneko.
Abeltzainen lanaren erakusle
Ferien sorburua den azienda feriak ere ez du hutsik eginen. Hala, Malerrekako abeltzainek egiten duten lanaren erakusle izanen da Merkatu Plazan bilduko den azienda saila. Behiak, ardiak, behorrak... egonen dira ikusgai eta tratuan aritzeko ere baliatuko dute aunitzek hitzordua.
Karrikak girotzeko musika
Musikarik gabe, nekez irudika genezake besta egun bat eta udazkeneko feriek ere badute bere doinua. Azienden hotsak eta saltzaileen ahotsak, gaita soinuarekin nahasiko dira bertze behin ere, gaitariak ibiliko baitira karrika buelta eginez.
Bortz buru eta txapela bakarra
Nafarroako I. Mailako Aizkora txapelketaren finala jokatuko dute Ezkurra pilotalekuan. Leitzako Jon Rekondo eta Ruben Saralegi, Zigako Joxean Etxeberria, Lezaungo Juan Jose Lopez eta Iker Vicente ariko dira lehian eta lau kana-erdiko, lau 60 ontzako eta bi oinbiko moztu beharko dituzte. Txapelketa 18:00etan hasiko da. Herri-kirol jaialdiaren barne, harri-jasotze erakustaldia eskainiko du Mikel Lopetegi Urrak. Sarrera 15 euro ordaindu beharko da.
