Otaño nagusitu zaio Mindegiari Doneztebeko aizkora apustu ederrean

Ttipi-Ttapa/Xorroxin 2016ko mar. 21a, 10:45
Mindegia eta Otaño, lanak akitutakoan. Argazkia: Ibon Errazu Uria

Beizamakoak minutu eta erdiko aldea atera zion Zubietakoari, jendez lepo zegoen Ezkurra pilotalekuan

Aizkora apustu ederra eskaini zuten martxoaren 20an Doneztebeko Ezkurra pilotalekuan Beizamako Eneko Otañok eta Zubietako Mieltxo Mindegiak. Aizkolari bakoitzak 3.000 euro jokoan, hamabina kanaerdiko eta launa 60 ontzako moztu behar zituzten. Otañok 41 minutu eta 35 segundo behar izan zituen lanak bukatzeko, Mindegia gazteak berriz 43 minutu eta 5 segundo, minutu eta erdi gehiago. Ikusi Ibon Errazu Uriaren argazkiak

Mieltxo Mindegiak, Miel eta Hilario Mindegia, aita eta osaba izan zituen erakusle; Otañok, Floren Nazabal eta Arkaitz Jauregi.

Otaño zerbait aitzinetik ibili zen neurketa osoan, baina apustu arras polita izan zen, Doneztebeko pilotalekura hurbildu ziren 600 bat aizkora zaleren gozamenerako. Otañok bere inguruko zaletu gazte ugari eraman zituen Doneztebera eta giro bikaina izan zen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun