1976ko apirilaren 21ean atxilotu zuten Anparo Arangoa eta jasandako kolpeen ondoren egin zizkioten argazkiek oihartzun zabala izan zuten. Gaur, Giza Eskubideen Nazioarteko Egunean, aitortu dio ofizialki Nafarroako Gobernuak torturaren biktima izaera. Beste sei nafarrek lortu dute gaurkoan aitortza: Iñaki Beorlegi Rekalde 1973. urtean atxilotu eta torturatu zuen Brigada Politiko Soziala izeneko polizia sekretu frankistak. Purificacion Galarza Otxoa Guardia Zibilak torturatu zuen 1979an. Javier Perez de Obanos Oiarbide bi aldiz atxilotu eta torturatu zuen Espainiako Poliziak: 1981ean eta 1987an. Pedro de Miguel Caballero ere beste horrenbestetan atxilotu eta torturatu zuen Guardia Zibilak, hamar urteko aldearekin: 1994an eta 2004an. Ane Buitron Zazpek, 1995ean, eta Mikel Soto Nolascok, 2002an, Guardia Zibilaren tratu txarrak eta torturak jasan zituzten.
Nafarroako Torturatuen Sareak eta Egiari Zor fundazioak osatzen duten Egiaren Garaia dinamikak ontzat jo du Nafarroako Gobernuaren ebazpena: «Emandako ebazpenak positiboki baloratzen ditugu, estatu indarkeriak gure lurraldean izan duen eragina agerian jartzeko baliagarriak diren heinean, eta uste dugu, halaber, Nafarroan eta Euskal Herri osoan Estatuak eragindako giza eskubideen urraketa larriak argitzen jarraitzeko ere lagungarri izan behar dutela».
