Arratsaldean, 16:00etatik 18:00etara, puzgarriak izanen dituzte pilotalekuan, eta 18:30ean atsaure kalejira hasiko da plazan, herriko musikariekin. Kalejiraren harira, ALKE Altzadi Leitzako Kultur Taldeak «etxetik atsauretuta» joateko gonbita egin du; hau da, «aurpegia zapi batez estali edo belztu, eta, zaku, trapu zahar, zintzarri, luma, makila, maskuri edota sarde batekin kalejiran eta festan parte hartu».
Eguna borobiltzeko, 20:00etatik 21:30era eta 23:30etik 01:00etara Muxutruk erromeria taldea ariko da karrapean. Eta bihar arratsaldean, 17:00etan, Ekain pailazoak eskainiko duen Arlote bat ikuskizunarekin borobilduko dituzte Leitzako ihauteak.