Emakumeei omenaldia egin diete Goizuetan inauteri asteartean

Aurten 25 urte bete dira emakumeek ofizialki mozorroetan parte hartu zutenetik eta oroigarria emateaz gain, lehendabizikoz emakumezko batek zahagiaren rola hartu du. Argazkiak: Felix Loiarte

Aurtengo inauteri asteartean emakumeei omenaldi ttiki bat egin diete Goizuetan. Izan ere, aurten 25 urte bete dira emakumeek mozorroetan ofizialki parte hartu zutenetik.

Keinu bat egin nahian, oroigarri gisa, asteartean zapi bat zintzilikatu eta makilekin zahagi dantzari hasiera emateko aukera luzatu zieten. Gisa bertsuan, lehendabizikoz, emakume batek zahagiaren papera hartu zuen eta ohore hori Garazi Loiarteri egokitu zitzaion.

Eguraldia eta giroa lagun izan zituzten eta guztien parte-hartzeari esker, karrikak kolorez bete ziren: andaluziarrak, Benidormera zihoaztenak, erromatarrak, galiarrak... bertaratu ziren. Bertako herri-kirolek, buruhandiek, txistulariek, oihaneko animaliek, sanba dantzariek... ere ez zuten hutsik egin.

 

Erlazionatuak

Bikingoz bete da Goizueta

Leitzaldea Goizueta

Haur, gazte eta heldu denak bikingoz jantzita atera dira Goizuetako inauterietako astelehenean. Asteartean, berriz, mozorroak herriko karriketan ba...
Gaztetxoen zahagi dantzarekin hasi dituzte inauteriak Goizuetan

Leitzaldea Goizueta

Igande arratsaldean, gaztetxoak zahagi dantza eginez ibili ziren. Astelehenean, berriz, mozorroak baserrietan ibiliko dira.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun