Kontatu duenez, inauterietako kinto egunean aipatu zuten lehenengoz desafioa egiteko aukera, eta bizpahiru lagun elkartu eta aitzinera egitea erabaki zuten. Denera 24 lagun ariko dira, hiru taldetan banatuta. «Gazteenak 19-20 urte dituzte eta helduenok 33-34 urte ditugu», azaldu du.
Entrenatzen hasiak dira dagoeneko. «Plazara atera eta saio txukun bat egin nahiko genuke herritarrek aunitz baloratzen dutelako. Bizkorki ari gara entrenatzen, jendeak nahiko serio hartu du», nabarmendu du Zelaietak. Izan ere, ia gehienak inoiz herri kiroletan aritu gabeak dira, eta lehenengoz plazaratuko dira.
Taldeak sortuta, erabaki dute dagoeneko zein kiroletan ariko diren: koxkor biltzen, lasterka, harria altxatzen, arpanean eta aizkoran. «Hori izanen da lehen proba, eta bigarrena oraindik ez dugu zein den erranen, jendearentzat sorpresa izan dadila nahi dugu», dio antolatzaileak.
Desafioa egin aitzinetik dagoeneko giro ederra sortu da horren bueltan herrian, eta pozik dira antolatzaileak. «Taldeen arteko pikea baino saio txukun bat egin nahi genuke, ongi pasatu, eta bestetan giro ederra izatea. Lehen izaten zen tradizio hori berreskuratu nahi dugu eta lehengoa oinarri hartuta, gurera moldatu dugu desafioa».
Zelaieta hagitz kontent dago orain arte izandako harrerarekin: «Oharkabean ateratako kontu bat izan zen, eta hiru kuadrillatako jendea bildu gara. Orain plazara atera eta saio txukun bat egitea bakarrik falta da eta jendea animatu dadila ikustera». Eta desafioa bukatzean zer? «Afari bat eginen dugu parte hartzaile denek eta epaileek eta ea arratsa zenbat luzatzen den».
