35 lagun bildu ziren Baztan-Bidasoko Pentsiodunen Mugimenduak deituta Beran egindako elkarretaratzean. Karrikara ateratzen hasi zirenetik egin dituzten aldarrikapenak aipatu zituzten, hala nola, «Bidasoa ospitaleko zerbitzua bermatzeko eskaera, pentsiodunek Euskal Herri mailan egindako bizikleta martxa, gerren kontrako aldarrikapena, gastu militarrik ez egiteko eta gastu militarra gastu sozialetara bideratzeko eskaera, ekosozialak indartzeko deia, Endara Bizirik, Erdiz Bizirik, Aroztegia Gelditu, makroeolikoak baztertu, Palestina askatu...». Hemendik aitzinera ere aldarrikapenekin segituko dutela argitu zuten, baina ez zuten adierazpenik leitu.
Atzokoa maiatzaren 30ean zendu zen Iñaki Gogortza Billabona oroitzeko elkarretaratzea bilakatu zen. Hark egindako guztia «aitortu eta eskertu» nahi izan zuten pentsiodunen mugimenduko kideek, bertako kidea baitzen Gogortza. Igandean egindako omenaldia aipatu zuten, «hori dena eta gehiago ere merezi zuela» nabarmenduz. Horrekin batera, «gure lema» hizpide hartuta, «zuk utzitako motxila, gure artean banatuko dugula» adierazi zuten: Eskerrik asko Iñaki, zuk emandako guziagatik».