Beti Gazteko zuzendaritza batzordeko Paola Oskozek Suediako mundialean sokatira taldeak egindakoa gogora ekarri du. Beti Gazteko sokatira taldeak sei domina lortu ditu klub arteko txapelketan, urrezko bortz eta zilarrezko bat eta bertze bortz domina nazioarteko txapelketan, urrezko eta zilarrezko bana eta brontzeko hiru. Baina eguraldiak ez zuen luzamendutarako aukerarik ematen eta hor bukatu da ekitaldia.
Ongietorri beroa eta umoretsua egin diote Beti Gazte sokatira taldeari Lesakan
Euripean izan baldin bada ere, ongietorri beroa eskaini diote Suediako munduko txapelketatik bueltatu den Beti Gazte sokatira taldeari Lesakan eta, inauterietako astelehena izaki, umoreak ere izan du bere tartea. Hasteko, tunaz mozorrotua zegoen musika bandaren laguntzarekin joan dira sokatira taldeko neska-mutilak plazaraino, herritarren txalo artean. Jaione Telletxeak eta Mikel Galardik aurreskua dantzatu diete tiralariei eta Abesbatzaz mozorrotutako neska taldeak Beti Gazteren himnoa bizpahiru tonu goitiago abestu du dotore, plazara bildutakoen irri artean. Ondotik, musika bandak ‘Clavelitos’ tuna kantaren bertsioa abestu die, mundialean lortutako garaipenak goraipatuz eta lesakarren izenean eskerrak emanez. Bukatzeko, musika bandak berak, sokatiran elkar animatzeko erabiltzen duten ukondo kolpeekin elkar agurtu eta Beti Gazteko tiralariek tiraldi eta tiraldi artean erabili dituzten plastikozko oinetakoak paratu eta Beti Gazteren himnoa jo dute, tiralariei krabelin bana oparitu aitzinetik.
Erlazionatuak
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun