Herriko trikitilariek eta panderojoleek musika paratu zioten goizari. Plazan artalde ederra ikus zitekeen eta frontoian, berriz, merkatua, bertakoek ekoitzitako eta landutako produktuen eta eskulanen hamazazpi erakusketa edo salmenta postuez hornitua. Baratzeko uzta, gozokiak, opilak, zerrikiak, eskolako eta Pele-Ttikiko materiala, eskulanak, argazkiak... Denetarik eta gustu guzietarako izan ziren. Urtero bezala, eskolak paratutako ostatua ere hantxe zen tragoxka eta pintxoa hartzeko.
Hauek izan ziren postuak: Pabloenea, Apezenea, Etxerrea, Etxeberriko borda, Ixabel Lukanbio, Senberro, Pelle Ttiki, Alberto Pikabea, guraso elkartea, eskola, Felix Apezetxea, Seroren borda, Maixol Almandoz, Olaberri, Xuberoa-Gaikoenea, Etxezarreta eta Mikel Larretxea. Eta ardiak, berriz, bortz baserritatik eraman zituzten: Goiko Egusuta, Aranibar, Seberiano Indakoetxea, Ximoneko Antonio Iturria eta Larretabaita.
Gazta eta ahari lehiaketa
Gazta lehiaketan sei gazta aurkeztu zituzten. Epaimahaia Leire Mitxelenak, Iñigo Etxeberriak, Mikel Manzanok, Rosa Arburuak eta Erramun San Juanek osatu zuten eta lehenbiziko saria Laraburuko bordako gaztak eraman zuen (120€); bigarren saria Etxeberriko bordako gaztarentzat (100€) izan zen eta hirugarrena berriz, iaz bezala, Martineko bordako gaztarentzat (60€). Ondotik, hiru gazta sarituen enkantea egin zuten.
Ahari lehiaketan, berriz, Ximoneko Antonio Iturriarenak hartu zuen saria.
Ohitura den bezala, bertako ekoizleek emandako produktuekin osatutako zarea edo saskia ere zozketatu zuten eta Dabit Iturriak eraman zuen.
Asteburuan ekitaldi gehiago
Orain arte kultur egunetan izan diren hitzorduez gain, asteburuan ekitaldi gehiago izanen dira. Larunbatean, Ekaitza Elkartean, 16:00etan partxis txapelketa eta 18:00etan mus txapelketa jokatuko dituzte.