Urtarrilaren 2tik aitzinera, Bortzirietako medikuntzako aurrez aurreko kontsultak (helduenak eta haurrenak) Lesakan eginen dira, eta gainera mediku batek etxeko bisitak eta zaharren egoitzak artatuko ditu. Herrietako kontsultategi guztiak irekita egonen dira erizainen plantilla osoarekin, eta erizainak zuzenean komunikatuko dira medikuekin. Administrariek egun hauetan Lesakan arreta behar duten paziente guztiak deituko dituzte, eta egunean bertan kontsultara joateko, 08:00etatik 10:30era hartuko dira deiak, eta ordu horren ondotik, bakarrik larrialdiko deiak hartuko dituzte.
Urtarrilaren 9tik aitzinera, espero dute behar diren errefortzuak ailegatuko direla, eta, orduan, lehengo egoerara itzultzea espero dute, eta mediku bakoitzak bere herriko kontsulta pasatzea, Lesaka estali behar denean izan ezik (talde osoaren artean banatzen baita).
Oharrean gaineratu dutenez, oraingo egoera honi konponbide bat ahalik eta azkarren aurkitzeko promesak egia bihurtzea espero dute bileran parte hartu dutenek: «egoera hau ez da desiragarria ez herritarrentzat ez osasun etxeko langileontzat —diote—, baina zirkunstantziek behartuta gaude. Herritarren ulermena beharrezkoa da eta guztion babesa eskertzen dugu».
