Ttipi Txartela

«Produktua bertakoa eta ekologikoa izatea hagitz garrantzitsua da guretzat»

Ttipi-Ttapa 2022ko uzt. 21a, 12:00

«Lagun artean maiz erraten genuen eta erraten dugun hitza da buatxabal eta gu egunero kamisetak egiten ari garenez, serigrafiatu eta lagunen artean banatu genituen». Horrela hasi zen marka lesakarra, eta orain kirol-jertseak, kamisetak, biserak, poltsak… egiten dituzte, «baita garagardoa ere. Azken hau gure bezeroekin egindako elkarlanetik dator, hagitz harreman estua dugu eta aunitzetan sortzen dira elkarlanak».

Serigrafiak bertan egiteari garrantzia ematen diote; «Serigrafia.eus markapean beti  Nafarroan inprimatua jartzen dugu, hori da gure aldarria. Herri ttiki batean bizi gara eta bizirik mantendu nahi badugu, bertan ekoiztea hagitz garrantzitsua da». Gainera, material ekologikoak erabiltzen dituzte, «gure ingurua eta ongizatea bermatzeko».

«Bertan egiteak eta ekologikoa izateak produktua aunitz garestitzen duela uste dute aunitzek, baina ez du hala izan beharrik. Guk soilik Lesakako dendan eta online saltzeko erabakia hartu genuen, modu honetan salmenta zuzena da, erdibidekoak kentzen ditugu eta prezioan eragina du». Gainera, bezeroarekin harreman zuzena dute; «hori hagitz garrantzitsua da guretzat eta bezeroak hurbiltasuna baloratzen du».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun