Antzerako proiektu bat izan zuten Leitzako eskolan ere. Bi kasuetan, irakasle klaustro ia osoak parte hartu ohi zuen, eta batzuetan baita atezainak, sukaldariak edo gurasoek ere.
Prozesu osoa ikasleek egiten zuten: gidoia prestatu, kamerarekin grabatu, agertokia prestatu eta azkenean bideoa muntatu. Baina potoloena, telebistako estudioa nola antolatzen zuten ikustea izaten zen; bik aurkezle papera egiten zuten, bertze batek erregidore lana, grabatzeko hiru kamera erabiltzen zituzten, nahasketa mahaiaz bertze ikasle bat arduratzen zen... Azkenean, Teleskola zuzenean ematen zuten liburutegiko pantailan, eta gurasoek zein gonbidatutako jendeak ikusten zuen urtean osoan zertan aritu ziren etxeko Hitchcock ttikiak. Borobiltzeko, Teleskolako grabazioa Ttipi-Ttapa telebistan emititzen zuten.
