Aipatzekoa da 2021 urtea 1.458 bazkiderekin bukatu duela, iaz baino 143 gehiago eta inoizko kopururik handiena. Horietatik 1.133 Lesakakoak bertakoak dira, baina badira Igantzikoak (75), Etxalarkoak (63), Berakoak (45), Irungoak (31), Arantzakoak (26), Doneztebekoak (15)… Batzarrean bazkideen kuotak bere horretan mantentzea erabaki zen.
Elkartearen egoitzaren egoera ere hizpide izan zuten. Udaletxetik Alondegia eraikinarekin zer egin nahi den erabakitzeko prozesu parte-hartzailea ireki du. Beti Gaztek bertan gelditzeko borondatea dauka. Hori aipatu zen batzarrean eta prozesuan parte hartuko du elkarteak.
2021eko ekitaldi berriak
Kirolarekin eta kulturarekin lotutako ohiko ekitaldiekin batera bertze zenbait ere egin zituen iaz Beti Gaztek: herriko dantza taldeen topaketa irailean, Bortzirietako Mutxiko Topaketa maiatzean, argazkilaritza tailerra, errekaren eguna uztailean, Lesakako Bitxikeriak lehiaketa, sukaldaritza tailerra, errege opil tailerra, mahai joko txapelketa, familientzat mendi irteerak, multikirola campusa, ‘Mendian hil, hirian hil’ dokumentala… Bertze batzuk, aldiz, ezin izan zituzten gauzatu: irteera kulturala, Lesakako Mendi Lasterketa (aurten bai, igandean eginen dute hirugarren edizioa), Pirinioetara irteera, San Antonera ibilaldi arautua, Lesakako Zubigaineko krosa, mendi irteerak, Neguko multikirol campusa…
2022an ekitaldi gehiago
Aurten ere ekitaldi horiekin eta gehiagorekin segitzeko asmoa du Beti Gaztek. Erran bezala, igande honetan Lesakako hirugarren mendi lasterketa eginen dute eta hiru tailerretan izena emateko epea zabalik dago. Horietaz gain, sukaldaritza tailer gehiago, lehen sorospen eta desfibriladorearen erabileraren inguruko ikastaroak, ‘Mendia 1976’ dokumentalaren emisioa, Teruelera bidaia kulturala, Lesakako Bitxikeriak lehiaketako edizio gehiago, pintura tailerrak, txirrindulari gazteen topaketak eta Lesakako Mendi Itzulia antolatuko dute aurten, bertzeak bertze.
