Ttipi Txartela

«Udaberriaren etorrerarekin batera jendeak loreak erosten ditu»

2015ean ireki zuen Josune Urrozek Zu lore-denda Beran. «Formazioz dekoratzailea naiz eta bere garaian paisajismoa egin nuen urte batez baina ez nuen bukatu, eta beti izan dut hor arantza. Hortaz, duela urte batzuk formatu eta lore-denda irekitzea erabaki nuen».

Loreez gain, landareentzako eta dekoraziorako osagarriak saltzen ditu bertan, «baina landareak eta lore moztuak dira gehien saltzen direnak». Salmentak «goi-denboraldiak eta behe-denboarldiak» izaten ditu, «urtero errepikatzen direnak»; udaberrian hasten da epe luzeena, «martxotik ekainera bitarte, kanpoko landareak saltzen hasten gara eta udaberriarekin batera jendea mugitzen hasten da, gainera amaren eguna eta ezkontzak hasten dira orduan». Uda «epe motelena» da salmentei dagokionez, «eta urrian hamabostaldi indartsua izaten da». Eguberrietan ere «mugimendua nabari da».

Beran «lehen ez zegoen loreak erosteko aukera aunitzik, orain gehiago erosten dira, opari erraza baita eta denei gustatzen zaiena». Pandemia egoera «ez da erraza izan, baina etxea apaintzeko barneko landare aunitz saltzen ziren orduan, orain, berriz, ezkontzako loreak gehiago saltzen dira». Loreak saltzeaz gain «oinarrizko aholkularitza» eskaintzen die Urrozek bezeroei, «baina landareen zainketa hagitz erlatiboa da lorearen arabera, non paratzen den, argiak ematen dion edo ez… baldintzak ez dira berdinak izaten».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun