Eguzkik prentsa-ohar baten bitartez adierazi duenez, «nahiko zantzu daude pentsatzeko Nafarroan, Gipuzkoan eta Lapurdin ia 2.000 hektarea kiskali zituzten suteak nahita piztutakoak izan zirela. Are gehiago, Lapurdiko herriek dagoeneko bide penalari ekin diote».
Elkarte ekologistak azpimarratu duenez, kiskalitako mendiek bi ezaugarri komun dituzte: titulartasun publikoa eta abeltzaintzako erabilera, eta, beraz, «ikerketa lerro zehatz hori has liteke». «Nolanahi ere, –dio Eguzkik– XXI. mendeko Euskal Herrian, mendiari su emateko praktika neolitikoak ohikoa izaten jarraitzen du».
Sute horiek biodibertsitateari egiten dioten kaltea izugarria dela azpimarratu ondotik, Eguzkik gogorarazi du, «gehien sufritu zuten lekuen artean Natura 2000 sareko hiru Kontserbazio Bereziko Eremu (KBE)» daudela, «zehatz-mehatz, Larrun eta Xoldokogaina, Bidasoa ibaia eta Aiako Harria».
