Sua, haize zakarrak bultzatuta, azkar hedatu da Bidasoaren hegoaldera eta iparraldera eta lur eremu handia hartu du. Ibardingo inguruetan etxebizitza, baserri eta borda batzuk hustu behar izan dituzte.
Cordovillako eta Oronozko parkeetako suhiltzaileak, Bera eta Lesakako suhiltzaile boluntarioak, baso-suhiltzaileak eta mendizainak ari dira lanean. Haize-bolada gogorrek Nafarroako Gobernuko helikopteroei hegan egitea galarazi diete, eta, ondorioz, Torrejongo baseko hegazkin bat eta helikoptero astun bat eskatu dizkiote Ministerioari.
Sutea Irun, Biriatu, Urruña eta Azkaineraraino ailegatu da
Azkaine eta Urruña artean suhiltzaileek 68 lagun sokorritu dituztela jakinarazi du Philippe Le Moing-Surzur suprefetak: horietako 40 bentetan atzeman dituzte, bertze hogei mendian eta azken zortziak Larungo trenean jautsi dituzte. Suprefetaren hitzetan, bi sute dira pizturikoak: bata Berakoa eta bertzea Larhun mendikoa.
Gipuzkoara ere hedatu da sutea Endarlatsatik. eta, hortaz, Gipuzkoako Foru Aldundiak dozena bat ibilgailu eta hogei bat suhiltzaile mobilizatu ditu hori itzaltzen ahalegintzeko.
