Maiatzean erabaki zuen Lesakako udalak aurtengo sanferminak bertan behera uztea. Nahiz eta egoerak nabarmen hobera egin duen, arriskua oraindik hor dagoela diote osasun adituek eta Lesakako udalak «bestetan hain ohikoak diren jende pilaketak ekiditea guztion ardura dela» jakinarazi du ahobatez onartutako adierazpenaren bidez.
Honela, «Lesakako herritarrei segurtasunarekiko dugun konpromezuarekin jarraitzera» dei egin diete eta «jende pilaketa ekarri dezaketen ekitaldi berezirik» ez antolatzea eskatu diete. Herriko ostalariek uztailaren 6tik 11ra ostatuak goizeko ordubietan ixteko erabakia erabat babesten du Udalak, «kontrakoak sektore honi ondorio hagitz larria eragin diezaiokela» jakinik.
Uztailaren 6, 8, 9 eta 10a udalaren jardueran lan egunak izanen dira eta ez dute asteburu honetan eta hurrengoan herri eremuan kanpinik jartzen utziko.
Hain zuzen, udalaren oharrak dio aurten ezin izanen dituela «bazter guztietatik guregana etortzen direnak hartu aunitz estimatzen dugu euren etorrera. Baina, erran bezala, gauzak desberdin bizitzea tokatzen zaigu, eta eskatzen diegu aurten Lesakara Sanferminetan ez etortzea. Heldu den urtean berriro elkar ikusiko dugu.
