Larunbat goizeko 5etan Lesakatik abiatu eta arratsaldeko 6etan Altsasura ailegatzea espero dute
Guztiz arrakastatsua suertatu zen urriaren 15ean Lesakako Tantirumairu Ikastolak antolatutako Nafarroa Oinez. Eguneko ekitaldi eta ospakizunen artean, 2018ko Nafarroa Oinezeko antolaketaren lekukoa eman zioten Tantirumairuko ordezkariek Nafarroako Ikastolen Elkarteko ordezkariei eta hauei, Altsasuko Iñigo Aritza ikastolakoei. Baina ez zuten lekukoa egun berean eraman. Aurtengoan, mendiz lasterka eramateko asmoa erakutsi dute altsasuarrek eta horretarako hitzordua finkatu dute urriaren 21ean.
Lau errelebo eginen dituzte bide horretan. Larunbat goizeko 5etan Lesakatik abiatu eta Eratsunera joanen dira; Eratsunen 09:30ean abiatu eta 12:00etan ailegatuko dira Lekunberrira; Lekunberritik Lizarrustira joanen dira (16:00) eta azken zatian, Lizarrustitik Altsasura (18:00). Altsasura ailegatzean, Iñigo Aritza ikastolako ikasleek lekukoa plazaraino eramanen dute eta bertan lehendakariak hitza hartuko du.