Apirilean jakinarazi zuen enpresak Legasako eta Aguraingo lantegietan 40 langile kanpora bidali nahi dituela. Astelehen honetan, berriz, enplegua erregulatzeko espedientearen kontsulta epea akordiorik gabe akitu dute. ELAren arabera, «prozesu osoan agerian gelditu da enpresa ez dela gai izan arrazoiak justifikatzeko. Aurkeztutako dokumentazioa ez da nahikoa izan beraien asmoak eta espedientearen beharra esplikatzeko. Beraien inkoherentziak maiz gelditu dira agerian».
Sindikatuak jakinarazi duenez, «hainbat alternatiba» proposatu dituzte, «langileendako irtenbide hobea eta enpresarentzat arrunt egingarriak zirenak. Baina enpresak hasieratik erakutsi du langileen ordezkaritzari aditzeko asmo falta».
Egoera ikusita, langileek hainbat asanblada egin dituzte, bai Legasan, baita Agurainen ere, eta ELAk adierazi duenez, «langileek ia aho batez erabaki dute greba mugagabea hastea». ELAk «argi» du «planteatutako arazoari irtenbidea emateko alternatibak badaudela», eta hala «enpresaren erabakien kostua langileen gain ez gelditzeko, beharrezkoak diren presio neurriak hartzeko» prest agertu da.
Bertzalde, ELA sindikatuak aste honetan jakinarazi du erregulazioaren kontra errekurtsoa aurkeztuko duela Auzitegi Nazionalean.
