Ekainaren 18an Getxon eman zioten hasiera egitasmoari, halere, 19an hasi ziren oinez eta uztailaren 20an akituko da Cap de Creusen, Gironan. Ibilaldia 9 zatitan banatu dute, gure eskualdea zeharkatzen duena lehenbiziko zatia izanik. Denera 200 lagunek parte hartuko dute eta horietatik hiruk ibilaldi osoa eginen dute Getxotik Cap de Creuseraino. Helburu bikoitzagatik ibiliko dira: gure lurraldean gizarteratzeko arazoak eduki ditzaketenei laguntzeko eta baita herriak sentsibilizatzeko ere.
Ekainaren 20an, larunbatean, egin zuten geldialdia Beran eta biharamunean heldu ziren Baztanera: lehenbizi Lekarozera eta ondotik Elizondora. Lekarozko aterpetxean eman zieten afaria eta lo egiteko lekua eta Elizondoko plazan harrera egin zieten hurrengo egunean. Hortik partitu ziren Urkiaga aldera.
