Nafarroako Hezkuntza Departamentuak erabaki du heldu den ikasturtean Lekaroz institutuan A ereduan aritzeko bortz irakasle A ereduko plazatik aterako dituztela. Horrek erran nahi du irakasle erdaldun elebakarrek eginen dutela gaur egun D ereduko irakasle elebidunek egiten duten lana, ondorioz, lanaldi osoak zirenak lanaldi erdi bihurtuko dira. Ikastetxeko irakasleak erabakiaren kontra agertu dira, «ondorio larriak» izanen lituzkeelako A ereduko ikasleen integrazioan eta euskararen defentsan.
Baztango Lehen Hezkuntzako ikastetxeek atxikimendua erakutsi diote institutuari, eta mobilizazio kanpainarekin bat egin dute hainbat eskolek, tartean Amaiurrek, Almandozek, Arizkunek, Iruritak, Oronoz-Mugairik, Urdazubi-Zugarramurdiko eskolak, Elizondoko eskolak eta Baztan Ikastolak.
