Lekarozko San Bartolome bestak hasi ziren abuztuaren 22an, ortzegun arratsean, Joseba Oskariz kirolariak piztutako txupinazoarekin. Lehenxeago lortua zuen Oskarizek ardura hori, kirol apustu berezi baten protagonista izan baitzen. Eñaut Jauntsaratsekin batera, Oier Ariztegiren eta Gorka Aldakoren kontrako apustua izan zen: Legateko itzulia egin zuten bizikletaz eta lasterka eta gero aizkoran aritu ziren plazan. Oskariz eta Jauntsarats suertatu ziren garaile eta Oskariz txupinero.
Haurren pilota txapelketako finala ere jokatu zuten ortzegun arratsaldean, txupinazoa baino lehen. Gero, Baztan zopen afarian 130 bat lekaroztar elkartu ziren eta Beñat Mitxelenaren musikarekin akitu zuten bestetako lehen eguna.
Gaur gazteen eguna izanen da, bihar San Bartolome egun handia eta igandean ttikien eguna.
