Haur Hezkuntzako ikasketak egin ditu Garmendiak, eta gazteen familia barneko tratu txarren detekzio goiztiarra eta marrazkien bidezko analisia izan ditu aztergai azken lanerako, Fernando Trébol Unzué irakaslearen zuzendaritzapean.
Arlo teorikoan, tratu txarrak, detekzioa eta adingabeen esku-hartzea aztertu ditu. Esparru praktikoan, aldiz, Baztango zerbitzu profesionalen lan sarea aztertu du, baliabideak sortu ditu detekzio goiztiarrerako eta zentroetan erabilgarria izaten ahal den protokolo bat egin du.
Garmendiaren erranetan, «babesgabetasunari buruzko ezagutza ttikia dago gizartean, tabutzat hartzen den gaia delako, eta tratu txarrak arras guttitan gertatzen diren uste okerra dago». Hezkuntza sisteman, «profesionalek ez dute gaitasunik egoera horiek ikasgeletan detektatzeko eta esku hartzeko, gaiari buruzko ezagutza ttikia baitute eta eskolek ez dutelako jarduera zehatz eta garatuen protokolorik. Hortaz, erraten ahal da irakasleek ez dakitela nola jokatu egoera horietan».
