Baztango Mugimendu Feministak, Mugimendu Transmaribibolloak, Elizondoko Herriak eta Baztango Udalak jakinarazi dutenez, «31 arratsean, neska gazte talde bat komunean zegoela, herriko mutil bat arras jarrera biolentoarekin haiengana hurbildu zen. Neskek behin baino gehiagotan erran zioten bakean uzteko baina mutila gero eta biolentoago jarri eta nesketako bati ostikoa eta ukabilkada eman zizkion. Honen aitzinean gizona ihes egiten saiatu zen, eta saiakera horretan, ostiko baten bitartez, taldeko bertze neska bati eraso egin zion. Hau guztia gutti balitz, bere bi lagunen laguntzaz ihes egiten ari zen bitartean, neska taldea mehatxatzen hasi zen, guztiak joko zituela etab. erranez».
Adierazi dutenez, «besta giroan emakumeen kontrako erasoak biderkatu egiten dira, eta hala izaten segituko du erasotzaileek bere ingurukoen babes eta konplizitatea izaten jarraitzen duten bitartean. Erasotzaileak babestu eta laguntzen dituzuen guztiak: zuek ere parte hartzen duzue indarkeria jokaera hauetan, arazoaren parte zarete, erasoan parte hartzen duzue eta zuengatik ez balitz, gure azaletan pairatzen ditugun biolentziak ez lirateke posible izanen».
Bertze behin ere, «argi gelditu da zeinen garrantzitsua den neska* eta emakumeok* elkarren artean saretuak eta babestuak egotea. Emakume* bakar bat ukituz gero, gu guztiok parean izanen gaituzuela. Behar den guztietan ozen oihukatuko dugu ez dugula beldurrarekin bizitzen segitu nahi, ez eraso baten aitzinean, ezta egunerokoan ere. Indarkeria matxistarik gabeko herrien alde, gora borroka feminista!».
