Autoa asteazken goizaldean bertan aurkitu zuten Arraiozen. Ibilgailua eta hura gidatzen ari zen emakumea Nafarmendi hipermerkatuko aparkalekuan zeuden geldituak, ezbeharra gertatu zen tokitik arras hurbil.
Harrapaketaren biktima artatzeko mobilizatutako Foruzaingoko patruilak auto hori ikusi eta gidaria identifikatzera joan ziren. Emakume horrek erran zienez, han gelditu zen uste baitzuen autoak matxuraren bat zuela, ibilgailuak portaera arraro bat izan zuelako, eta ez zuen inolaz ere aipatu pertsona bat harrapatu zuenik.
Kalteak autoaren azpian
Hurrengo goizean, ibilgailuaren titularra Foruzaingoaren komisariara deitu zuten, eta, ondotik, Iruñera eraman zuten. Han, lehen ikuskapenak egin zizkioten autoari eta azpian kalteak zituela ikusi zuten. Kalte horiek bateragarriak izan daitezke gorpu bat harrapatuz gero sortzen ahal diren kalteekin. Hala ere, kalte horien kokapenak adierazten du gaztea galtzadan etzanda zegoela harrapatu zutenean, eta autopsiaren txostenak berretsi egin beharko du orain gorpuak dituen lesioak horrela eragin zirela.Gauzak horrela, autoa gidatzen zuen emakumeari ez diote oraingoz inolako deliturik egotzi, eta Foruzaingoaren hipotesia erabat berresten bada, litekeena da auzia artxibatzea instrukzioaz arduratuko den epaitegiak.
