Joan den urtean elkarrizketatu zuen TTIPI-TTAPAk erratzuarra. Kontatu zuenez, «betitik» izan du mendirako afizioa baina azken urteotan haratago eraman du bere zaletasuna, eta Draveten sindromea ikusgai egiteko munduko mendirik adierazgarrienak igotzeko erronkarekin ari da buru-belarri. Hasieran hurbileko mendietan hasi zen Apoyo Dravet elkartearen bandera tontorretara eramaten eta 2019an mendi altuetan hasi zen, bere hitzetan, «horrek ematen duelako ikusgarritasuna».
2019ko uztailean Mont Blanc (Frantzia-Italia, Alpeak, 4.808 m) igo zuen eta 2020ko otsailean, Aconcaguara (Argentina, Andeak, 6.961 m) joan zen. Hirugarrena Kilimanjarora (Tanzania, 5.885 m) egitekoa zuen, baina Covid-19agatik Kilimanjarora joan ezinik gelditu zen. Horren partez, Pirinioetan bertze erronka handi bat egitea erabaki zuen eta Frantzia aldetik, Vignemalera (Frantzia-Espainia, 3.298 m) igo zen eta bertze aldetik jautsi. Eta biharamunean Anetora (Espainia, Pirinioak, 3.404 m) eta Maladetara (Espainia, Pirinioak, 3.312 m) joan zen. 2021ean, berriz, Alpeetan izan zen eta Monte Rosa (Suitza, Alpeak, 4.634 m) eta Cervino (Italia- Suitza, Alpeak, 4.778 m) igo zituen.
Aurten, berriz, Atlas mendikatea du begiz joa, eta uztailaren 17an eta 18an, bi egunez, Toubqal (4.167 m), Ras (4.083 m) eta Timezguida (4.089 m) igo nahi ditu. Hurrengo erronka Kilimanjaro (5.895 m) izanen du, Tanzanian. Horrekin heldu den urteko otsailean saiatu nahi du Iñarreak.
