Arizkungo harrobiaren proiektuaz

Canteras Acha SA-ko arduradunari Arizkungo Herriaren izenean

Arizkungo Aintzialde eta Bergara auzoetan burdin-harririk ba ote dagoen jakiteko, Canteras Acha enpresak zundaketak egin nahi ditu. Aferari buruz aritzeko herritarren batzarra egin zuten Arizkunen abenduaren 11n eta baita egitasmo honen kontrako elkarretaratzea ere abenduaren 19an. Arizkungo herriaren izenean gaur goizean Imanol Etxeberria Arizkungo alkateak eta Ioseba Oskariz kargodunak honako gutun hau entregatu diote eskura Canteras Achako arduradunari.

Arizkungo herriaren izenean zuzentzen naiz zuregana.

Prentsaren bidez jakin genuen Aintzialden eta Bergaran zundaketak egin nahi dituzuela burdin-harria dagoen edo ez jakiteko eta, hala bada, harrobi bat egiteko.

Hori jakin bezain fite herriko batzarra egin genuen herritarrak informatzeko, genekien gutti horren berri emateko eta aldi berean herriaren iritzia biltzeko. Horretarako, bertze batzar bat deitu genuen jendeak bere iritzia bozka bidez eman ahal izateko. Bigarren batzar horretan Arizkunek argi utzi zuen: ez dugu harrobirik nahi, ezta zundaketarik ere.

Bozketaren egunean, 155 herritar bildu ginen eta bakar batek ere ez zuen dudarik izan harrobiaren kontra egiteko. Arizkungo batzarraren %100ak ez du Aintzialde eta Bergaran harrobi bat nahi eta arrazoiak aunitz dira: inguru horretan 12 etxebizitza daude, 12 familia, hainbat abeltzaintza-ustiategi, Bergarako Jauregia, borda aunitz, iturriak eta auzoa hornitzen duten ur-biltegiak, oihanak eta abar.

Arizkundarrok gure nekazal eta bizitoki eremua den hori dagoen bezala uzteko eta defendatzeko lanean ari gara, gure lurrak herritarrontzat nahi ditugulako. Ez dugu amore emanen. 

Beraz, idatzi honen bidez, Arizkungo herritar guztien izenean, zuen asmo hau  lehenbailehen bertan behera uzteko eskatu nahi dizugu.

Zure erantzunaren zain geratzen naiz.

Arizkunen, 2021eko abenduaren 22an

Imanol Etxeberria Antxorena, Arizkungo alkatea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun