Orain «denetarik» egiten dute, baina argazkigintza digitalarekin «jendeak mugikor edo ordenagailuan gordetzen ditu argazkiak, aise gutiago errebelatzen dugu». 1983an Donezteben ireki zuten bigarren argazki-denda bat eta bertan lanean hasi zen Iriarteren anaia, Patxi Iriarte. «Malerrekan eta Bidasoa inguruan lan aunitz egiten genituen eta zerbitzu hobea emateko hantxe ireki genuen».
Erretratuak lantzen dituzte Zalduan, «ezkontzak gehienbat, baita bataioak, erreportaje orokorrak, estudiokoak…». Markoztatzeak ere egiten dituzte, «argazki akabera guztiekin». Jendeak bere argazkiak ateratzen ditu «eta guri ekartzen dizkigute luma-kartoian handitzeko». Aro digitalera moldatu behar izan dute eta web orri bat sortu dute; «argazkiak eta erreportajeak egin ondotik, hor paratzen ditugu jendeak etxetik lasai-lasai aukeratzeko hona etorri beharrik gabe».