Proposamena EH Bilduk eta Ezkerrak eraman zuten ezohiko osoko bilkurara eta aipatu bi alderdien aldeko 8 botoak nahikoak izan ziren proposamenak aitzinera egiteko. Geroa Bairen bi zinegotziek abstentziorat jo zuten eta Navarra Sumako hiruek proposamenaren aurka bozkatu zuten.
Baztango udalak bere prentsa oharrean zehazten duenez, «zerbitzu publikoak modurik eraginkorrenean kudeatzeko gogoeta egiten ari da Baztango Udala» azkeneko urteetan. Horrela, «udalaren kirol instalazioak kudeatzeko Giltxaurdi enpresa publikoa sortu zuen udalak eta, orain, eskoletako eraikinak eta mediku kontsultategiak garbitzeko Lixura enpresa publikoa sortzeko bidean da. Adinekoen egoitza ere zerbitzu publiko garrantzitsua izanik, zerbitzuaren kalitatea, arreta eredua, langileen baldintzak, bideragarritasun ekonomikoa… kontuan hartuko duen kudeaketa eredu publikoa finkatu» nahi luke udalak.
Aldi berean, «zahar etxea berritzeko bulkaldiak segitzen» duela zehaztu dute. «Momentu honetan zahar etxe berriaren arreta-eredua, banaketa eta eraberritze arkitektonikoa eta bideragarritasun ekonomikoa aztertzeko txostena akitzen» ari da udala. Halaber, «2021eko Nafarroako Gobernuaren aurrekontuetan Elizondoko zahar etxearen berritze-proiektua idazteko 200.000 euroko dirulaguntza izenduna onartuta dagoela» nabarmendu du alkateak.