Igandean giro epel eta eguzkitsua izan zuten Amaiurren Errotaren Eguna ospatzeko. Errotako tresnen inguruko erakusketa izan zen egun osoan eta Txanbezpel Ipar Euskal Herriko musikariek giro polita paratu zuten. Felipe Oiartzabal eta Isabel Gallego, Amaiurko errotako arduradunek gogotik egin behar izan zuten lana bixitariak asetzeko taloak egiten eta azalpenak ematen, bisita gidatuetan. Artisautza eta Baztango produktuen azoka ere egin zen eta eguerdian Baztango errotei buruzko diaporama aurkeztu zuten.
Arratsaldean bertako arto hazien trukea egin zen eta dantza herrikoiak izan ziren nahi zuen guztiarendako.